بشرى إلى إخواننا فى غزه

فى إجتماع عاجل للجامعه العربيه على مستوى الملوك والرؤساء لمناقشة الأوضاع فى قطاع غزه وبعد إنتهاء الجلسه أصدر الأمين العام للجامعه القرار التالى:ـ
إتفقت الدول العربيه فى إجماع غير مسبوق أن ترفض ما فعله الكيان الصهيونى بإخواننا فى غزه وأنه سوف يتم إرسال شحنه ضخمه من السلاح إلى إخواننا فى غزه لمساعدتهم فى مواجهة الآليه العسكريه للكيان الصهيونى وإليكم تفصيل هذه الشحنه:ـ
1 / عدد 5000 دبابه من طراز نشجب
2 / عدد 10000 صاروخ طويل المدى طراز ندين
3 / عدد 7000 طائره مقاتله من طراز نعترض
4 / عدد 8000 مدرعه طراز نحتج
5 / عدد غير محدود من سلاح الصمت
أبشروا يا عرب
النصر قد إقترب

وأتموا الحج والعمرة لله

قد من الله تعالى على بأداء فريضة الحج هذا العام مع بعثة الحج

الرسميه لدولة الإمارات العربيه المتحده وكنت أحد أعضاء البعثه

العاملين وقدأكرمنى الله تعالى وحصلت على شهادة تقدير ومكافأه

ماليه تقديرآللجهد الذى بذلته وكان من ضمن أسباب نجاح البعثه

بنسبة نجاح قاربت 100%

عاوز إسم

لما بحب أبحث عن مدونتى على محركات البحث زى جوجل بلاقيها ما بتظهرش إلا بشق الأنفس وده راجع لسبب إن لفظ الغالى تقريبآ هو أكتر لفظ مستعمل فى النت ربما لا يخلو منه موقع واحد مكتوب باللغه العربيه .
وعليه قررت وكلى أسف إنى أغير إسم المدونه لكنى ما زلت أبحث عن الإسم البديل.

عواد باع أرضو يا ولاد

من زمان واحنا عيال صغيرين كنا نسمع فى الراديو أغنيه بتقول عواد باع أرضوا ياولاد شوفو طولو وعرضو ياولاد . كنا نغنيها واحنا مش فاهمين أى حاجه . لكن حكومتنا الرشيده صعب عليها ان احنا نفضل كده مش فاهمين تراثنا الفنى الجميل ده فحبت تفهمو لنا بس بطريقه عمليه . بطريقه هانى رمزى فى فيلم غبى منو فيه (أبسطهالك ) فقالت أنا عواد ومصر دى أرضى شوفو هبيعها إزاى عشان تفهموا. ماكنش ناقص من الحوار غير ان الحكومه تقول لنا ماهو لو ما عملتوش كده مش هتتجوزوا ساميه(نيللى كريم)وعلى غرار فيلم عايز حقى برضو لهانى رمزى بدأت الحكومه فى البيع .الظاهر إن الحكومه معجبه جدآ بهانى رمزى . يارب يكونو شافو فيلم ظاظا .

بس هانى رمزى عمل مزاد علنى وقيم الأصول بقيمتها الفعليه لكن حكومتنا عمات ايه بقى ؟ تعالو نشوف

قيمت الأصول ب200 مليار جنيه فى حين انها فى سنة 90 قيمت نفس الأصول ب 500 مليار جنيه .الحكومه من سنة 90 لدلوقتى بترفع أسعار أى شئ على المواطن لكن لما تييجىتبيع البلد تخفض الأسعار تقريبآ إلى الخمس.

باعت الحكومه ب 200 مليار لكن اللى دخل خزينة الدوله فقط 24 مليار . فاضل 176 مليار جنيه راحو فين ؟

24 مليار فى الخزينه أكثر من نصفهم صرفوا على تطوير الشركات اتى سيتم بيعها فى المرحله المقبله . وأاااااااااااااااااااااااااااه يا بلد

الحكومه مشكوره هتوزع على المواطنين أسهم بـ2000 جنيه لكل فرد بالغ من العمر 18 سنه . وما دون السن مش من البلد دى.

مفيش واحد ابن حلال يشترى الشعب المصرى الغلبان ده يا ولاد؟هو ده الحل الوحيد لأن ساعتها اللى اشتروا البلد بتراب الفلوس مش هيلاقو شعب يتاجرو عليه ويمصو دمه فهما اللى هيخسروا زى ما حصل زمان فى احدى الكنائس فى أوروبا لما خزينة الكنيسه فلست وصل الأساقفه لحل انهم يبيعوا أراضى فى الجنه للمؤمنين وفعلآ بدأ الناس يشتروا واللى ما معهش فلوس يا عينى بقى يحاول بشتى الطرق انه يتحصل على تمن متر فى الجنه لحد ما جه واحد غنى وقال لهم أنا عايز أشترى النار قالو لو ياعم نار ايه اشترى فى الجنه أحسن قال لاء أنا هشترى النار كلها وأدفع اللى انتو عايزينو قالو خلاص وباعو له النار فخرج من الكنيسه والصك فى ايدو ونادى على الناس اللى منتظرين دورهم عشان يشتروا فى الجنه وقال لهم أنا إشتريت النار كلها وأوعدكم إنى مش هدخل حد النار أبدآ فمشى كل الناس وما حدش اشترى فى الجنه وفوت الفرصه على المتاجرين بالدين فى تحقيق مكاسب من دم الناس.
عشان كده عايز حد يشترى الشعب المصرى والمزاد مفتوح عشان نفوت على الناس دول فرصة مص دمنا .
وألاأونا
ألادوا
ألاترى

والله زمان يا ست عفاف

من30 أو 35 قول 40 سنه غنت عفاف راضى وقالت مصر هى أمى وإحنا كلنا رددنا وراها وده صحيح فمصر هى أمنا كلنا . بس الأغنيه دى خلتنى أسأل سؤال لو كانت مصر هى أمنا طيب مين أبونا؟هل إحنا من غير أب ؟إحنا ولاد سفاح؟

لا والله احنا ولاد حلال بس يتامى أبونا مات قبل ما نشوفه . أبونا يا ولاد هو أول من حكم الأرض دى وان كنا مش عارفين هو مين بالتحديد لكنه مات وأمنا إتجوزت بعده كتير . فكل واحد ييجى يحكمنا هو جوز أمنا وآه من جوز أمنا

مش عيب إن أمنا تتجوز ولا غلط بس عيب جوازها إنه جواز كاثوليكى مفيش طلاق . يفضل جوز أمنا هو جوز أمنا لحد ما يموت بياخد خيرها ويعبى فى جيبه. وايه يعنى ما الواحد فينا لما بيتزنق بياخد ذهب مراته .لما بيجيلها معونه من بره بياخدها لنفسه . وايه يعنى دى عيديات وهدايا من بيت أهلها ما يا خدها زى ما بنعمل احنا ولا احنا هنحلله لنفسنا ونحرمه على جوز أمنا ؟ لما بتمر امنا بضيقه بيقول لنا هاتوا أمال انتوا ولادها ليه . وايه يعنى ما كفايه انه متجوز أمنا ومشيلها اسمه . يا ناس عيب إختشوا على دمكوا .دا حتى المثل بيقول اللى يتجوز أمى أقول له ياعمى . فاسمعوا كلام عمكوا عشان ما تزعلوش أمكوا .

أنا وعيلتى بناكل بجزمة الوزير

فى مره من المرات طل علينا وزبر همام من وزرائنا اللى يا كترهم فى برنامج تلفزيونى آعد منشى وعلى سنجة عشره وحاطط رجله فى وشنا وله حق طبعآ مهو معالى الوزير وفى شياكته دى كلها لفت نظرى جزمته جزمه لو عند واحد مننا ما كنش لبسها لاء كان علقها فى الصالون دا لو عنده صالون من أصله سألنا على تمن الجزمه دى لقيناه 3000 جنيه

فى حين ان مصروف بيتى فى وقتها شامل الفواتير وكل شئ فى الغلا ده 750 جنيه فى الشهر يعنى بحسبه بسيطه انا وعيلتى ممكن ناكل بجزمة معاليه 4 شهور كاملين واحنا فى منتهى السعاده.

ده بالنسبه للجزمه أما الساعه ياناس فكانت بـ 750000 جنيه أيوه سبعمائه وخمسون ألف جنيه . إذا كنا هناكل بالجزمه 4 شهور الساعه هتعمل معانا ايه ؟

كوكتيل أحاسيس

حاسس بشعور غريب من نوعه جوايا كوكتيل أحاسيس متناقضه ما ينفعش تتجمع على انسان فى وقت واحد
حاسس اتى حزين بس مبسوط وقلقان بس مرتاح وذهنى صافى بس فيه مية مشكله بيتخانقم جواه حاسس انى عاوز اتكلم مع أى حد وفى نفس الوقت أفضل ساكت .
اللى هيقرأ الكلام ده هيقول الغالى اتهبل يارجاله بلانجليزى . مش بس بلانجليزى لاء بكل لغات العالم كمان. لكن ااكد لكم انى لسه ما اتهبلتش وان كان دا احتمال وارد جدآ لأنه ما عتش بينى وبين الهبل الا انى أترجم كلامى ده فى صورة افعال يشوفها الناس يعنى مثلآ أعيط وأضحك فى وقت واحد ( منا حزين وفرحان بقى )
دورت على سبب للحاله اللى انا فيها دى ولقيت سبب واحد ورا كل ده واتأكدت منه لما لقيت نفس الحاله دى عند كتير من الناس اللى أعرفهم .
عارفين ايه السبب ؟
الغربه . أيوه الغربه . انا حالى زى ملايين المصريين عايش بره مصر وسايب أهلى جريآ ورا لقمة العيش كتير منكم لو عرفوا انا عايش فين هيقولوا يا بختك بس صدقونى لو جربتوا اللى انا أقصد اللى احنا فيه هتعزرونى
أنا عايش فى مكه المكرمه والمفروض أو الوضع الطبيعى ان اللى فى مكه ما يكنش غريب ولا حتى يشعر بالغربه بس ده لو كانت الغربه غربة مكان .
ازى الحال بقى لما تبقى الغربه غربة الروح . أيوه الروح . لما تعيش فى وسط ناس يعاملوك على انك أقل منهم
لما تتنادى بالأجنبى لما تكون ماشى فى حالك وينادى عليك واحد ما تعرفوش تبص له فيشتمك
مش عايز أخوض فى الأمثله لأن الغلط مش غلط الناس دى فى الأساس . الغلطه غلطة أم رمت ولادها وحرمتهم من خيرها رغم ان خيرها كتير قوى بس للأسف خيرها لغيرها. الحاله اشتغلت وعايز اسكت وانا بتكلم فهسيبكم بقى بس قبل ما أمشى هقول لكم حكمه
(أنا مكتئب إذآ أنا مصرى )

وزير التعليم الفاشل وكادر المعلم

وزير التعليم الفاشل الفاشل الفاشل بالتلاته عمل سابقه لم تحدث فى التاريخ . آل إيه يا خويا إمتحن المدرسين والموجهين والنظار والمديرين عشان يأهلهم لرفع مستواهم التعليمى وعشان يستاهلوا الزياده الرهيبه فى الرواتب اللى هيمن بيها عليهم الإمتحانات أو الإختبارات زى ما سماها اتعملت وكان فيها شرط غريب جدآ وهو انه يمنع على كل المتقدمين للإختبارات استخدام أى قلم غير القلم الرصاص فى ورقة الإجابه رغم ان الورقه المكتوبه بالرصاص لا يمكن اعتبارها مستند قانونى باى حال ولما نتكلم شويه عن النتيجه يمكن نعرف السبب ورا الشرط ده.
طلعت النتيجه وكان فيها من المهزله ما فيها :
1 :مدرس لغه عربيه راسب فى العربى . (وهاتك يا معايره من الطلبه )
2:مدرس لغه انجليزيه فى محافظة الغربيه راسب فى اللغه الإنجليزيه وناجح بتفوق فى اللغه الإيطاليه (خدوا بالكم مفيش ولامدرسه فى محافظة الغربيه بتدرس لغه ايطاليه)
3 :ناظر مدرسه راسب وهو الراسب الوحيد فى المدرسه جميع المدرسين اللى تحت رياسته ناجحين.(عينه مكسوره ووشه فى الأرض ياعينى)
4 :آلاف أدوا الإختبارات طلعت نتيجتهم . الأكاديميه تخطركم بعدم تقدمكم للإختبارات ومستنينكم السنه الجايه إوعوا تتأخروا ( الزوج لزوجته المدرسه . رحتى فين يوميها يا هانم وما رحتيش الإمتحان أكيد كنتى عند أمك اللى انا مانعك تروحى لها وقلتى هتطلع النتيجه راسبه وخلاص بس ربنا كشف سترك . عليا الطلاق يا امك تدفع الزياده فى الراتب اللى راحت علينا كل شهر يا منتى آعده فيها)
5 :نتايج ناس ظهرت الصبح ناجحين وبعد الضهر معلهش هارد لك .
هكتفى بالنماذج دى وهطلب من سيادة الفاشل الوزير وليس الوزير الفاشل طلب واحد.
سيادتك الوحيد اللى تابع للوزاره اللى ما دخاتش الإختبار طبعآ انته ومحاسيبك. عايزينك تدخل إختبار انته وهمه بس اللى يحط لك الإختبار موجه راسب واللى يراقب عليك مدرسين راسبين واللى يصححوا ورقكك مديرين راسبين وابقى قابلنى لو جبت مقبول حتى .
الوضع الطبيعى دلوقتى أدام كل متضرر هو الشكوى . طيب الشكوى ما جابتش نتيجه ومش هتجيب . يبقى نرفع قضيه على وزير التعليم هبااااااااااااااا ورقة الإجابه اللى هى المستند الوحيد مكتوبه بالرصاص .ياعين أمك يا خويا يامدرس . يا قلب أمك يا ختى يا مدرسه .سلموا أمركم لله ونصيحه منى إوعوا تقولوا لطالب ما ذاكرتش ليه لأن رده الطبيعى كنت ذاكر انته الأول ياساااااااااااااااااااااااااااااااااااااااااااااااااااااااااااااااااااااااااااااااااااااااااااااااااقط

عيب عليكوا

فى مصر تم وقف إعلان عن منشط جنسى لأنه كان يشتمل على أغنية خلى السلاح صاحى لعبد الحليم حافظ كخلفيه للإعلان وكان سبب منع عرض الإعلان كما أوردته وكالات الأنباء هو الإساءه إلى تلك الأغنيه العظيمه التى وضعت لشحذ همم الجماهير أيام حرب 73 . كان هذا هو السبب وراء وقف عرض الإعلان وسرعان ما إستجابت الشركه المعلنه والمحطه الفضائيه التى تعلن وأوقفت عرض الإعلان .ولكن يبقى السؤال ماذا لو كان السبب فى طلب وقف عرض الإعلان هو الإساءه إلى بناتنا ونسائنا بل وإلى رجالنا أصحاب النخوه فى بيوتهم حينما نبث عليهم مثل هذه الدعايات التى تحتوى على مثل هذه الإيحاءات المقززه التى تقتل فينا الحياء؟
سؤال آخر يطرح نفسه ما قولكم فى إعلان المسمار وإعلان ديمآ بره الخدمه و إعلان شاليمو العصير ؟ وكلم تعرفونها
والله أنا أكتب هذا الكلام على إستحياء ولكن من الضرورى أن أطرح هذه الأسئله .لو أنى أملك المال الكافى لأنتجت لكم إعلان على حسابى أقول لكم فيه إختشوا على دمكوا.

جارى البحث عن سعد نبيهه (wanted )

ما أن جاء العيد فى جمهورية عصر الغربيه حتى لاحظ الجميع أنه بغير طعم على خلاف الأعوام السابقه وعليه إجتمعت على الفور إدارة الأعياد بوزارة الداخليه برئاسة السيد / مبارك مبروك أبو الهنا كبير المعيدين(بكسر وتشديد الياءالأولى )للوقوف على أسباب هذه الظاهره الخطيره وذلك بتكليف من السيد / عيد سعيد فرحان وزير الداخليه وبعد قراءة جميع رسائل التهانى وسماع جميع أغانى العيد من قبل اللجنه الموقره خرجوا بنتيجه أرجعت السبب فى هذه الظاهره إلى عدم تردييد أغنية أهلآ بالعيد هذا العام حيث إكتشفوا من كلمات الأغنيه أن سعد نبيهه بيخليها (أى أيام العيد ) فرح وهنا وزغاريت وعليه صدر بيان من وزارة الداخليه إلى جميع مديريات الأمن بسرعة ضبط وإحضار المذكور لتكتمل فرحة الناس بالعيد ومن ثم تهيب وزارة الداخليه بأى مواطن يملك معلومات تساعد فى القبض على المذكور أن يدلى بتلك المعلومات إلى أقرب قسم شرطه وقد رصدت لذلك مكافأه قيمه عباره عن خمسه كيلو شيكولاته من النوع الفاخر وعشرين بلونه ملونه مختلفة الأحجام والأشكال + دعوه لشخصين لقضاء العيد فى مراجيح الدوله .

وجاء العيد

إلى كل كل مسلم إحتفل بالعيد فى المسارح أو دور السينما وفى بعض الحالات فى الملاهى الليليه أرجوأن تلقوا نظره على هذه الصور التى تعكس لنا حال إخواننا فى فلسطين على مدار العام دون تفرقه بين يوم عيد أو غيره . أعلم أن الصور بشعه ولكن إذا نحن غضضنا الطرف عنها فمن يراها ؟ إذا لم نظهر لهم على الأقل التعاطف فمن ذا يفعل ؟
ربما يتهمنى البعض أنى أفسد على الناس فرحتهم بالعيد . أو أنى أدعوا إلى عدم الإحتفال بالعيد على الإطلاق . لكننا لو أعملنا العقل سنجد أنى لم أقصد هذا أبدآ ودليل ذلك أنى لم أوجه حديثى إلى الناس كافه وإنما إلى شريحة واحده بعينها تعرفونها جميعآ . وإلى هؤلا ونفسى قبلهم أقول رحم الله رجلآ أقسم ألا يضحك مابقى الأقصى فى يد الصليبين ورحم الله شبابآ ضحوا بحياتهم من أجل دينهم لأنهم رجال صدقوا ما عاهدوا الله عليه . أخى الكريم أنا لن أقول لك تخيل نفسك مكان ذلك الرجل الذى يلملم أشلاء ابنته التى فى عمر الزهور ولن أقول لك أختى الكريمه تخيلى نفسك مكان تلك الأم التى تسير مع أطفالها فتفاجئ بكلب يهودى يصوب بندقيته إلى أطفالها فيدب الذعر فيهم ولا أن تتخيلى نفسك مكان تلك المرأه التى يضرب أخوها أو زوجها أمام عينيها بلا رحمه كما فى الصوره ولا أن تتخيل أنت نفسك ياأخى مكان ذلك الشاب الذى يضرب ويهان أمام أهله هكذالأنه إن جاء ايماننا من هذه الناحيه فلن يأتى النصر.ولكنى أذكركم أن هذه أرضنا مغتصبه وقدس من أقدسنا يدنسه أحط خلق الله فوالله لقد سلبت منا كرامتنا يوم سلبت منا أرضنا ولم نحرك لذلك ساكنآ . فهل ياترى سنبقى هكذا نرضى لأنفسنا الذل والمهانه . أم أنه ستتحرك فينا نخوتنا . ونعمل لمستقبل نعيش فيه وقد أعزنا الله بالإسلام ؟

بدون عنوان

نقلآ عن مدونة طريق النورصدقونى عجزت عن إيجاد أية كلمات تصلح عنوان لهذا الكاريكاتير

جزا الله أختنا صاحبة المدونه المنقول عنها خير الجزاء

كلام فى الحب

رغم قسوتها عليا. إلا إنى بحبها .رغم البعد اللى ما بينا . ما أقدرش أستغنى عنها .عاشقها ونفسى يوم ما أجيلها تاخدنى تانى فى حضنها .لفيت كتير وشفت كتير .ما لقتش أبدآ زيها.طردتنى مره وألف مره.وغصب عنى بارجع لها.طاعه لربى وللرسول.اللى أمرونى بحبها.حبيبتى هيه مصر أمى.وفى دمى بيجرى حبها.

تهنئه

الأخوه والأخوات المصريين والمصريات الكا د حين والكا د حات اللى بيجروا ورا رغيف العيش لما انقطع نفسهم وبرضوا مش لقينوا بقول لكم (مبـارك) عليكم الشهر وأتمنى أن تستمتعوا ب (جمــــال ) العيد.

كلام فى الفن

أول كلمه : ـ
فى رأى العبد لله اللى عامل نفسه ناقد فنى رغم ان معلوماته عن الفن بالظبط زى معلومات طفل فى كى جى تو عن العولمه إن أجرأ فيـــلم أنتجته السينما المصريه فى الأعوام الأخيره هو فيلم (آسف للإزعاج)ورأيى
ده مالوش دعوه بموضوع الفيلم ولا مضمونه كأن يكون بيتعرض بالنقد مثلآ للأحوال فى بلدنااللى لاتسر عدو ولا حبيب وده ببساطه لأنى ما شفتش الفيلم ولا ناوى أشوفه لأن التذكره بعشره جنيه فى حين إنى بشترى بيها عيش لعيالى فى الأســــبوع والعيال لسه صغيرين ما أقدرش أجوعهم عشان أشوف الفيلم . المهم إن جرأة الفيلم اللى أقصدها هيه إسناد دور الأب لـــمحمود حميده رغـــم وجود حســن حســــنى .
يمكن السبب إن حسن حسنى ما بيلعبش إسكواش . طب إزاى يبقى حسنى وما يعرفش يلعب ؟
عمومآ يا عم حسن.........حسنى مبارك .......عليك دورك فى فيلم (آخر كلام) وربنا يجعله الأخيــــــــــــــــــــــــــــــــــــــــــــــــــــــــــــر.

كلام فى السياسه

أول كلمه : ـ
فى كل يوم من أيام رمضان عند الفطار بدعى ربنا بدعوه ما بتتغيرش على مدار الشهر ولا مدار السنين اللى عدت وهى نفسها أمنيتى عند مطلع كل عام جديد عارفين ايه هيه ؟ إنى قبل ما أموت أشوف بعنيه إنسان حى يرزق ولو بيتحرك بكرسى بعجل يقولوا عليه رئيس مصر السابق .

تانى كلمه : ـ
كلما سمعت إسم رئيس وزراءنا الحبيب أحمد نظيف إفتكرت عبد المعطى ناظر مدرسة المشاغبين لما طلبه الأباصيرى فى التليفون مدعيآ إنه مدير المنطقه التعليميه ولما سأله الناظر . مين يا فندم ؟ قال له أنا رابسو فسأله الملوانى . مين ده يا حضرة الناظر ؟ قال له ده اللى هينضف المنطقه . وأترك لكم التعليق.........

تالت كلمه : ـ
بمناسبة ذكر الملوانى خطر على بالى فكره إقتصاديه حلوه أوى وهيه إستبدال سياسة (شد الحزام ) بسياسة الملاوانى (كل ما تتزنق إقلع)